उचालेर सुदूरपश्चिमको सन्तान
सुदूरपूर्वकाे सगरमाथा चुमाउने रहर छ
छाउपडीबाट जाेगिएर
जन्माएकाे छाउराे हाे !
उमारेकाे हुँ पाठेघरमा
हुर्काएकाे हुँ बच्चादानीमा
उसलाई जन्माउन हजारपटक मरेकी छु
उसलाई बचाउन
घामपानी,हूरिबतास सहेकी छु ।
भाेकमरीमा भ्रूण रहेकाे बेला
पिचास र डङ्किनीका नाममा
झाँक्री र लामा उत्रेका हुन् मैमाथि
आगाे निलेर ओकलेकाे सन्तान हाे मेराे
यसलाई
काठमाडौं चिनाउनु छ मैले
पशुपतिनाथ पुराउनु छ मैले
नजन्मिदै परदेश हिडेका
यसका बाबालाई भेटाउनु छ मैले
महारा जाँदा जन्मिएकाे बबुराे हाे
अस्पतालमा सुईँ लगाउनु छ मैले
सुत्केरीमा निउराे खाएर न्वारान उतारेकी हुँ
निउराेबियन भिटामीन चखाउनु छ मैले
नाम राखिदिएका छन् पण्डितले- बुधे
बुधेलाई
बहादुर अनि वीर बनाएर
कालापहाड पठाउने छैन
बुद्धि दिएर
असल मान्छे बनाउने छु
बुधे एकदिन
सुदूरकाेमात्र हाेईन
सिङ्गाे देशकाे
सगरमाथाजस्तै अग्लाे मान्छे बन्नेछ !
