बुटवल,चैत २३
बुटवल ३, सहस्रपथमा रहेको लुम्बिनी बोर्डिङ् स्कुलमा एसइइ परीक्षा २०८० मा सम्मिलित विद्याथीहरुका लागि शुभकामना एवम् आशीर्वचन कार्यक्रम सम्पन्न भएको छ ।
विद्यालयका सहप्राचार्य कोशलराज बस्यालको अध्यक्षता र विद्यालयका व्यवस्थापन समितिका अध्यक्ष दयाराम बस्यालको प्रमुख आतिथ्यतामा सञ्चालित कार्यक्रममा विद्यालयबाट भर्खरैमात्र एसइइ परीक्षा दिएका विद्यार्थीलाई आशीर्वचन प्रदान गरिएको थियो । विद्यालयका संयोेजक सुदीप बस्यालले स्वागत मन्तव्य व्यक्त गर्नु भएको सोही कार्यक्रममा विद्यार्थीहरु आदित्य भुसाल, आनन्दिता श्रेष्ठ र मिगिन थापाले आफ्नो अनुभव सुनाउँदै शिक्षक र विद्यालयको प्रशंसा गर्नुभएको थियो ।
यसै गरी अतिथिका तर्फबाट मणिमुकुन्द कलेज विज्ञान संकायका संयोजक लक्ष्मण गैरे, त्रिभुवन विश्वविद्यालयका उपप्राध्यापक लेखक तथा समालोचक डा.शालिकराम पौडेल, विद्यालयका प्राचार्य एवम् प्याब्सन लुम्बिनी प्रदेशका अध्यक्ष लालहरि पाण्डे लगायतले विद्यार्थीहरुलाई अवको शैक्षिक यात्राका बारेका मार्गनिर्देशन गर्दै शुभ आशीर्वाद र शुभकामना व्यक्त गर्नु भएको थियो ।
विद्यालयका तर्फबाट विद्यार्थीहरुलाई मायाको चिनो समेत प्रदान गरिएको सोही कार्यक्रममा प्रमुख अतिथि दयाराम बस्यालले विद्यार्थीहरुलाई शुभकामना र शुवेच्छा प्रकट गर्नु भएको थियो ।
